子華神棟篤笑，返嚟喇，F5制又要ready！隔咗三年半，大家又可以再次叫「回水」同「除褲」。

子華今年7月開騷，一直被指係電影「票房毒藥」嘅黃子華，憑住賀歲片《棟篤特工》大翻身，開畫截至噚日，本港累積票房約3,748萬港元，連同澳門票房，累積票房合共將衝上4千萬元，一洗頹氣，實行再戲院旺到紅館。

據知子華神今年7月初到月中，喺紅館搞棟篤笑，有指預計開15至18場，主辦機構尚未公佈，但子華神忠粉喺網上熱烈討論點撲飛。

子華神自1990年首次喺文化中心搞棟篤笑《娛樂圈血肉史》，將歡樂帶畀觀眾，其後差不多隔年有舉行，2010年殺入紅館，上一次係2014年喺紅館搞《唔黐線唔正常》，搞棟篤笑28年來，喺全球開過逾350場棟篤笑，於同年子華宣告封咪暫別棟篤笑，有感現時香港好陌生，諗好多嘢已經笑唔出。

直至前年，子華都只係孖同陳法拉喺灣仔演藝做舞台劇《前度》，今年先再次正式開騷，雖然未正式宣佈開騷，但網上已有撲飛潮，子華為免粉絲被騙，日前喺Facebook作出呼籲：「鑑於近日有個別網站流傳能代訂黃子華2018棟篤笑門票，子華及本會為避免有任何人仕受騙而招致損失，現特別公告此並非官方授權售票網站。」